Gure Mauriziak! Garai bateko Elgoibarko emakume pandero-joleei, esker onez

Trikitia gizonezkoen mundua zen duela ez hainbeste urte. Baziren trikitilari emakumezkoak, baina ez ziren plazara irteten emakumeak zirelako. Plaza publikoa gizonezkoena zen, eta emakumea, egotekotan, gizonari laguntzeko zegoen. Plazan ziharduten emakumeak gaizki ikusita zeuden, fama txarra zuten, baina, hala ere, plazara irteten ziren.

Egoera, zorionez, asko aldatu da, eta, hori, besteak beste, orduko emakumeen ausardiari esker izan da. Maurizia Aldeiturriaga da, beharbada, ezagunena Euskal Herrian, baina beste Maurizia asko ere izan ziren.

Elgoibarren ere baditugu gure Mauriziak, eta, hain zuzen ere, haiei gure eskerrak emateko antolatu dugu ekimena. Gure Maurizien bila jardun dugu, eta lau topatu ditugu:

1.- Pantxika Zubizarreta Gurrutxaga (1888 – 1964)

2.- Juliana Esnaola Arakistain (1892-1974)

3.- Martzelina Zubizarreta Gurrutxaga (1892 – 1991)

4.- Juliana Zubizarreta Gurrutxaga (1910 – 2006)

Gure Mauriziak! ekimena martxoaren 11n, asteartean, izango da. Hitzordua Kalegoen plazan izango da, arratsaldeko 18:30ean, eta trikitia eta panderoa jo(tzen) duten herriko emakumeekin kalejira egingo dugu  Kalegoen plazatik Herriko Antzokira.

Kalejiran parte hartu nahi dutenek  aurretik deitu edo idatzi behar dute, mesedez: elgoibarmusika@gmail.com / 628 92 90 55 (Imanol)

Herriko Antzokian, berriz, Gure Mauriziak! jaia izango da: trikitia, kantua, dantza, omenaldia eta Aire! dokumentala.

Gure Mauriziak! ekimenaren antolatzaileak:  Elgoibarko Udala, Inazio Bereziartua Musika Eskola, Elgoibarko Izarra, Ongarri zine-kluba,  Haritz Euskal Dantzari Taldea eta Badihardugu elkartea.