Atxutxiamaika etapa berri baten atarian
2025. urtean 30 urteko jarduna beteko du Atxutxiamaikak, eta euskararen erabilera areagotzeko lan-ildo berriak martxan jartzeko garaia dela irizten diogu.
Ibilbide luze honetan zehar, hainbat izan dira garatu diren egitasmoak eta programak; batzuek denboran iraun dute, eta beste asko bidean geratu zaizkigu. Izan ere, gizarteko joerak nahiz herriko dinamika aldatzen doazen heinean, ezinbestekoa da gure egitasmoetan berrikuntzak nahiz aldaketak egitea, euskararen erabileraren sustapenean eragile izaten jarraitu nahi badugu.
Azken urteetan Atxutxiamaika Sailaren egitekoa zein izan behar den hausnartzen jardun dugu, eta 2025.urte hau aldaketak emateko urtea dela irizten diogu. Dagoeneko, eta zorionez, aisia eskaintza euskaraz egitea ez da balio erantsi bat Elgoibarren. Hala ere, euskararen kale-erabilerak behera egiten jarraitzen du, beraz, gure egiteko moduak birplanteatzeko beharra ikusi genuen.
Oporraldietan eskaini izan dugun aisia eskaintzari dagokionez, igarriko duzuen aldaketarik nabarmenena, Lehen Hezkuntzako umeei zuzendutako eskaintzarik egingo ez dugula izango da. Izan ere, adin horri bideratutako aisia eskaintza oparoa dela ikusita, gure baliabideak beste lan-ildo batzuetara bideratzea erabaki dugu: familien arteko euskararen sozializazioa, euskalduntasuna eta herritartasuna, kulturgintza eta kulturartekotasuna, hain zuzen ere.
UDAKO ESKAINTZARI DAGOKIONEZ
Atxutxiamaikak eta Udal Ludotekak eskaini izan dugu orain arte udako oporraldia. Aurtengoan, aldiz, eskaintza berezitua izango da. Hau da, Atxutxiamaikak Haur Hezkuntzako umeei eskainiko dizkiei txokoak eta Udal Ludotekak, Lehen Hezkuntzakoei egingo die eskaintza. LH1-3koei orain arte eskaini zaien moduan, astelehenetik ostiralerako eskaintza egitea dago aurreikusita.
Bukatzeko, urte hauetan guztietan gugan izan duzuen konfiantza eskertu nahi dizuegu, eta etapa berri honetan bidelagun izaten jarraitzea espero dugu.
