60 lagunetik gora, aurtengo Santa Ageda koruetan
Inoiz baino jende gehiago bilduko gara aurten. Otsailaren 4a larunbatarekin batera datorrela aprobetxatuta, 60 lagunetik gora jardungo dugu baserriz baserri kantuan eta eskean.
Hiru taldetan banatu eta lau baserri-auzotako etxeak koplatuko ditugu.
Nagusien bi taldeak goizeko 9:00etan bilduko dira Kalegoen plazan; familiena, berriz, 11:00etan. Bi taldeek 15:00ak aldera arte jardungo dute kantuan eta eskean, eta gero denek batera bazkalduko dute Idotorbeko elkartean.
Sei koplarik jardungo dute kantuan Elgoibarko baserri atarietan: German Meabebasterretxea, Jabier Ziarda, Juan Mari Areitio, Uxue Alberdi, Juan Jose Eizmendi Loidisaletxe eta Ane Labaka. Hauei laguntzeko, berriz, hiru trikitilari bikote osatuko ditugu – une honetan hirugarrena lotu ezinik bagaude ere-: Iñaki Olarte-Aitziber Larrañaga eta Ander Agirrebeña-Agurtzane Mujika. Azkenik, koruak osatzeko, 40 lagunetik gora bilduko gara.
Otsailaren 4an egun berezia da Elgoibarko Izarrako Santa Ageda taldearentzat, eta aurten ere ez diogu huts egingo ohitura zaharrari.
